متاهة مريم ل منصورة عز الدين

June 22, 2013, 1:19 pm

≫ Next: وزير الثقافة و شمس التبريزى

≪ Previous: أسطورة الأدب الرفيع ل علي الوردي

$

0

0

تترك الروايه بدوار خفيف فى رأسك..هل هو الحلم ام الواقع ام الرمزيه و لكن من يعرف و من يهتم؟

عشقت البدايه السريعه...هكذا بلا مقدمات طويله, بلا تهيئه للجو العام, بلا حشو البدايه الذى يصر عليه ادبائنا الكبار و ددت لو يتبنى كتابنا تلك النظرية و يرحموا قراء من تضييع الوقت و المجهود...بدايه اثرتنى و دفعتنى لانهاء العمل باى ثمن

لمسات من الرمزيه , العبثيه ,الواقعيه احيانا كونت متاهه مريم ..و متاهتنا معاها

شعرت بلمحات من اعمال رضوى عاشور الاولى...نفس البراءه و التكنيك...ليس تقليد...انما هى طبيعيه الادب النسائى معبرا عما لن تهمه سوى النساء ..لمحات زكريات افكار بلا منطق و كل المنطق

و كأننى اقرأ: تقارير السيده راء رضوى عاشور...اسمى ليس صعبا فاطمه ناعوت...بلا تقليد لكنه النمط و الطعم و الرائحه

---

وزير الثقافة و شمس التبريزى

June 23, 2013, 11:36 am

≫ Next: بلاش تلعبى فى دماغ الناس يا دينا

≪ Previous: متاهة مريم ل منصورة عز الدين

$

0

0

من ضمن قواعد الصوفيه اللى كانوا بيعلموها للدروايش الصغيرين اللى بيتربوا فى كنف العشق الالهى : انك لما تكره حد قوى , اجبر نفسك انك تتكلم عنه بالخير لمده 40 يوم و طول المده دى دافع عنه , افتكر مواصفاته الكويسة..و بعد كده هتلاقى نفسك بتحبه مع انه ما اتغيرش بس انت هتكون اتغيرت من جواك


عجبتنى قوووى القاعدة الرائعه دى و قلت اجبرها على اكتر حد بكره حاليا (تخيلوا انه مش محمد مرسى ! ) قررت اجربها على وزير الثقافة بما انه شتم كل اللى بحبهم و جوايا طاقه سلبيه فظيعة موجه له


و فشلت انى اتكلم عنه بالخير و لو 40 ثانية حتى :(


يا اما القاعدة فاشلة و غير قابله للتطبيق...يا اما انا لسه ما وصلتش لدرجة النقاء الروحى دى


يذكر انى اخدت القاعدة دى من كتاب: قواعد العشق الاربعون : رواية عن جلال الدين الرومى...جاءت على لسان رفيق دربه شمس الدين التبريزى

بلاش تلعبى فى دماغ الناس يا دينا

June 24, 2013, 2:49 pm

≫ Next: جبنة نستو

≪ Previous: وزير الثقافة و شمس التبريزى

$

0

0

-ابن خالتى: الشيعة اخطر على البلد من اليهود

-أنا: "فى غلاسه" اشمعنى؟

-ماما: "تتدخل مسرعه" مصر طول عمرها سنيه و هو كده ..بلاش تلعبى فى دماغ الناس يا دينا

-أنا: "فى غلاسة متزايده" انتى قلتى ايه لا مؤاخدة؟

-ماما: بلاش لعب فى دماغ الواد بكلامك العجيب يا دينا

-أنا: لا التانية...مين اللى قال ان مصر طول عمرها سنيه؟؟ ده الازهر اتأسس اصلا لنشر المذهب الشيعى

-الجميع: نعم؟

ثم ابدأ حوار من طرف واحد مدته 30 دقيقه فى تاريخ الدولة الفاطمية و الايوبيه :)

جبنة نستو

June 28, 2013, 4:37 pm

≫ Next: تبريرات لعدم وجودهم فى 30 يونيو

≪ Previous: بلاش تلعبى فى دماغ الناس يا دينا

$

0

0

و محدش بيتعلم من اللى حصل فى الاتحادية المره اللى فاتت...الاخوان كالعادة معسكرين فى رابعه العدويه على بعد خطوات من الاتحادية للانقضاض -كعادتهم- لما العدد يقل او لما حاجة تحصل مش على مزاجهم و راجع فيديو جبنه نستو يا معفنيييين من ابن كليتى الغير الحبيبة

 و اذكر حوار مع صديق لصديق لما اتسأل هو انتوا هاجمتهم خيام المعتصمين السلميين ليه؟؟ فرد بمنتهى القناعه: هو رسم  الجرافتى و تشويه القصر ده سلميه؟

و كانت النتيجة قتلى على الجانبين -مهما اراد الاخوان نفى ذلك- ...و اذا بنا نكرر نفس السيناريو بحذافيره...هما شباب الاخوان مش غاليين على شيوخهم؟

و لامتى نحط النار جنب #البنزين -اللى مش موجود مهما اراد وزير البترول نفى ذلك- و ندعى انها متولعش؟؟

تبريرات لعدم وجودهم فى 30 يونيو

June 28, 2013, 5:34 pm

≫ Next: عن حوليات و رفايع و تمرد :D

≪ Previous: جبنة نستو

$

0

0

البوست ده هيزعل منى ناس:

بعد جوله سريعة على بروفيلات الفريندز لاقيت عده اسباب او لنقول تبريرات لعدم وجودهم فى 30 يونيو:

1-نوع اخوان اصلا من النوع الرسمى و ده الذ نوع لانه واضح مع نفسه و مع الناس مع انه بيرفع الضغط

2-نوع اخوان بشرطة و دول يشلوا بلد بزيها

3-نوع ثورى بس "قرفان" من الناس العادية...مش بيحب اللى رشحوا شفيق...و اى حد عنده منزلش مظاهرات العسكر لاحس بياده و يع و كده "و بيرجعوا يشتكوا انهم بعيد عن الناس"

4-نوع شباب الاحزاب "الملتزمين حزبيا" و دول بروفيلهم مسخرة زى اليويو رايح جاى على حسب كلام الحزب ...لو ادى اشاره خضرا تلاقى 20 بوست مدح فى 30 يونيو ورا بعض..و مع اول قلق فى الحزب يشتغل على طريقة لف و ارجع تانى

5-نوع من بتوع "انا لا مع دول ولا مع دول" و ده نوع وسطى متميع كده طول عمره متعرفش هما عايزين ايه اصلا

6-نوع موافق على اهداف يونيو بس خايف من العنف..و الغريب ان النوع ده اغلبه ولاد مش بنات !!!!

7-منوعات بقى و خد كتير : انا مش نازل لانى محتاج اعمل ثورة على نفسى الاول , انا مش نازل لان البلد محتاجة ثورة فى الاخلاق مش فى السياسة !!!!!!!!!!!!!!!
**********************
رسالتى للنوع ال3 بس : لانى بعتبر نفسى منكم...وجودك بس هو اللى هيخلى المظاهرات تروح الناحية اللى تحبها...منعك بوجودك لهتافات العسكر هو الحل ...متقرفش من السرسجيه اللى نجحوا ثورتك قبل كده...و شباب ولاد البلد اللى بتقرف من شكلهم و كلامهم هما اللى بيلحقوك وقت ما بتقع مش ولاد الذوات....اهتف بعيش حريه عداله اجتماعية محدش هيعترض , شكل وجدان الناس بكلامك معاهم

عن حوليات و رفايع و تمرد :D

July 1, 2013, 4:45 pm

≫ Next: حوليات2: تمرد ليه؟

≪ Previous: تبريرات لعدم وجودهم فى 30 يونيو

$

0

0

و بما انك بتقرا المدونه فغالبا انت عارف "حوليات" ...التجربه المجنونه اللى جمعت مدونيين الوطن العربى انهم يكتبوا كل يوم و لمده سنه , التجربه اللى محدش عارف هى هتنتهى ل ايه؟ و محدش مهتم :D

و عموما لو لسه ما تعرفش شوف اللينكات دى
https://www.facebook.com/events/395862073865981/
http://365-posts-x.blogspot.com
https://www.facebook.com/365posts

و كأنه ماراثون طويل الكل بيجرى فيه و محدش مهتم بالجائزه...سيبك انت الجرى رياضه "و نص الجدعنه برضه" و الكتابه هدف فى حد ذاته...و بعيد عن اهداف زياده حركة المدونات و عدد زوارها يبقى الهدف الاصلى يوم ما فتحت رفايع من 3 سنين انى ببساطة اكتب لنفسى قبل ما اكتب للناس

هل اتوقع ان كل اللى ابتدى الماراثون ينتهى منه؟ هل لو بدأ النهارده 1000 هيوصلوا 1000 مش 999 ولا 1999 ولا حتى واحد؟؟ ....اجاوبك بصراحة ما اعرفش و مش مهم اعرف

الحاجة الوحيدة اللى اتعلمتها من تمرد ان احيانا لازم تتحرك قبل ما تفكر انت رايح فيك و انك تثق فى ربنا قوى انه هيوصلك لمكان يمكن افضل مما تتخيل

ببساطة كده اللى يجمع حوليات و رفايع و تمرد انهم ابتدوا من غير ما يعرفوا النهايه ايه 

حوليات2: تمرد ليه؟

July 2, 2013, 11:17 am

≫ Next: حوليات3: بتدعى علينا فى مولد النبى؟!

≪ Previous: عن حوليات و رفايع و تمرد :D

$

0

0

فى 15 مايو مضيت على استمارة تمرد ...يومها غيرت صورة البروفيل فى الفيس و حطيت بادج لتمرد مع صورتى و وقتها كتبت:

"و لأن جاكسون براون قال لابنه ك وصية: لا تسلب أحد الامل فقد يكون كل ما يملك

 و "تمرد" بالنسبه لى و بالنسبة لناس كتير : أمل ...حتى بعيدا عن المنطق و حسابات الواقع المعقدة

و لأن:

كل اللي عايشين للبشر

 من حقهم

يقفوا ويكملوا

يمشوا ويتكعبلوا

ويتوهوا أو يوصلوا

وإذا كنا مش قادرين نكون زيهم

نتأمل الأحوال ، ونوزن الأفعال

يمكن إذا صدقنا نمشي في صفهم

و لانى مش "تمرد" بس بحترمهم و مضيت معاهم....كان هذا التأييد" 

-هل من شهر و نص كنت اتخيل ان كل ده هيحصل؟؟ طبعا لا
************************
و لسه الناس عندى على الوول متخيلين ان كل البشر اللى فى الشارع دول فلول و بلطجيه و حزب وطنى... يا شيخ/ة اتقى الله بقى كل البشر دى حمير و انتوا بس اللى بتفهموا ؟؟


و افتح قناه الاخوان الاقى حد فى طنط رابعه العدويه رافع صوره لمرسى و هو بيصلى و تحتها "لهذا يرفضه العلمانيون" !!!!



ونقول تانى للمره ال3 الالف...فى صور لحسنى و هو بيصلى "و صور له بيحج كمان"...فى صور لبشار و هو بيصلى...صور طنطاوى و هو بيصلى كان جزء اساسى برضه من الاعلام ايام العسكر


*************************
خايفه؟؟ اه طبعا 

و خايفه اننا نبقى زى "أحُد" لما نزلوا يجمعوا المكاسب قبل ما الحرب تخلص...و خايفه العسكر يركبوها تانى...و خايفه على دم الناس من غباوه الاخوان..و خايفه على الاخوان نفسهم من غباوه بديع و رجاله...



و لسبب غير معلوم و غير مفسر فى جوايا أمل و فرحه بالامل ده بعد فتره طووووويله من اليأس و الاحباط ...و ترجع فيروز تدندن فى ودنى "فى أمل؟ ايه فى امل"

حوليات3: بتدعى علينا فى مولد النبى؟!

July 3, 2013, 5:49 am

≫ Next: حوليات4: مصر المخطوفة رجعت

≪ Previous: حوليات2: تمرد ليه؟

$

0

0

-"حسبى الله و نعم الوكيل فيكوا...اللهم ما شتت شملكم...يا اعداء الاسلام, اللهم ما انصر الاسلام و اجعل كيدكم فى نحركم"

-نعم يا عم الحاج؟؟!!!!!!!
************************

كانت الجمله الاولى هى ما تردد فى ميكروفون الجامع اللى جنب بيتنا بعد صلاه العشاء موجها كلامه لسكان المنطقة :D

بينما كانت الجملة الثانية هى رد فعلى الخالص...الراجل بيدعى علينا يا جودعان لا و بحرقه قووى ولا كأننا قاتلين له قتيل ولا كأننا جوز امه

هو حد قال لك اننا اعداء الاسلام؟؟ ده مجنون ده ولا ايه؟ اش حال ان الجامع ده دايما مليان يعنى الحمد لله احنا مسلمين اهو يا عم الحاج

و لنفترض انك بتدعى عليا ممكن اعرف بتدعى فى الميكروفون ليه؟؟ ما تدعى فى سرك يا اخى ولا هو دعاء ممزوج بالشتيمة بالمره

و ارجع و اقول اذا كان رب البيت بالدف ضاربا ..اذا كان عبمقصود بيدعى علينا فى وجود الرئيس "السابق" محمد مرسى ...لا و علينا كلنا كشعب مصر مش اهل شبرا بس

اه صحيح بالمناسبة ما انتوا بتدعوا على اليهود بقالكوا 70 سنه و مفيش فايدة برضه...قلوبكم باين عليها سودا و ربنا مش بيستجيب ليكوا ده بافتراض اننا بمستوى اليهود كمان
***********************
بالمناسبه من سنين و سنين كان فى كاتب اسمه فرج فوده قال مره و حذّر من خطر استخدام المساجد فى السياسة و الاحزاب بذات فى صلاة الجمعه لان اى كلام او اعتراض ليك يبوظ صلاتك

عارف الكاتب ده؟؟........... قتلوه 

---

حوليات4: مصر المخطوفة رجعت

July 4, 2013, 5:21 am

≫ Next: حوليات5:رايحين شهداء بالملايين

≪ Previous: حوليات3: بتدعى علينا فى مولد النبى؟!

$

0

0

هل كنت اتخيل و انا بمضى تمرد يوم 15 مايو ان كل ده هيحصل؟؟ هل كنت اتخيل يوم ما نزلت التحرير -30 يونيو- و قعدت ساعتين احاول الوصول من طرف الميدان لوسطه فلم استطع من شده الزحام ان كل ده هيحصل؟؟


يااااااه يا مصر...لسه بتفاجئنى !!! عارفين ايه ضربه المعلم فى الموضوع؟؟؟ انضمام حزب النور , لانه ببساطة خلى الموضوع شعب قدام اخوان مش اسلام قدم كفره

احيانا كنت اقع فى شرك اليأس و اقول ماتت و راحت...و ترجع تانى تصدمنى و تقول لى اصحى يا دينا ده انا بلد رجاله...ستات البيوت و الاطفال و العائلات اللى نزلت الشوارع و الميادين فى اعداد لا يراها سوى أعمى كانت نقطة الانطلاق..كم البشر اللى فى الشارع كان مرعب و مرهق و مثير للعجب من بلدى الاكثر عجبا...لكن كالعادة الاكثر عجبا هو رئيس غبى لم ير فى هؤلاء سوى بلطجيه و فلول ...بقى كل الملايين دى -و انا معاهم- بلطجيه؟

مصر كانت ببساطة مخطوفه مننا....كل يوم نفتح التليفزيون لنرى الاخوان بابتسامة صفرااااااا و على لسانهم "اخبطوا دماغكوا فى الحيط" , "موتوا بغيظكم"...فاذا انتهوا من تراث نظامهم الفاشل استدعوا نظام اكثر فشلا بجملته "خليهم يتسلوا"....سنه كامله 365 يوم من فقع المرارة المتوااااااالى 

جماعه حجريه بتبوس ايد مرشد...يتصدر مشهدهم البلتاجى بضحكته الصفراء من جانب, و صفوت حجازى بتهديده لشعب مصر من جانب, و صبحى صالح الذى دعى و هو على فراش المرض ان يتوفاه الله على الاخوان , و رئيس يوافق بلا تردد على محاصره المحكمة الدستورية, يرهبوا مصر ب"النفير العام" !!

تصرفاتهم غريبه على المصريين, و تلك العجرفه و التعالى و سوء الادب مع المصريين ببساطة لم يكن محتملا

خايفه؟ اه طبعا....مبسوطة؟؟ اه جداااا

واضح ان حوليات وشها حلو على مصر...فى يومها الاول يقوم الشعب و ها انا فى حولياتى ال4 اكتب بيان النصر

سيبك من اى حاجه...مصر المخطوفه رجعت

مين اللى يقدر ساعه يحبس مصر؟؟ و يجيب بلا تردد: ولا حد

حوليات5:رايحين شهداء بالملايين

July 5, 2013, 11:48 am

≫ Next: حوليات6: انا سحبت التعاطف ده بقى

≪ Previous: حوليات4: مصر المخطوفة رجعت

$

0

0

ع القدس رايحين شهداء بالملايين
ع سوريا رايحين شهداء بالملايين
ع الكرسي رايحين شهداء بالملايين
************************************
المشكلة ان لسه فى ناس مصره تسرق الفرحة...اصرار على السلطة و ان كانت على جثث المصريين...انا متخيلتش ان الجماعه دى و رئيسها المزيف "مرسى" و رئيسها الحقيقى بديع يكونوا بالعدوانية دى!!!

بمنتهى الوقاحة يظهر مرشد جماعة ليهددنا بحرب اهلية و انقسامات فى الجيش...بعد ولوله من ايتام مرسى على ضياع حرية الرأى و حمله الاعتقالات اللى طلعت تماما كمشروع النهضة اشبه بالفانكوش
**********************
سيبك انت لكل كارثة فؤائد: 
الاولى: اننا عرفنا مين قلبه عالبلد؟ و مين مصر متمثلش له اى حاجة غير اسيره مخطوفه يقعد على كرسى ملكها و لو على جثث و دم

و التانى: انى بنضف الفريندز عالفيس
و مع كل حدث بكتشف اخوان كمان و كمان فى الفريندز...و يا عينى مهما حاول يبقى لجنه و مختفى عن الانظار و كده يجى فى لحظة زى دى و الخروف اللى جواه ينقح عليه و يطلع يمأمأ فى حرية و انطلاق

و اخر المتمه واد لجنه مسجل باسم مسيحى...و لما شكيت فيه دخلت على البروفيل لقيته عامل لايك لصفحات "لا لتشوية الاسلاميين" و "لازم حازم"...صباااح الخير

 الفريندز عندى مليان زفت و ست امينه قالتها بكفايه زفت يا سى السيد على رأى واحد صاحبنا

حوليات6: انا سحبت التعاطف ده بقى

July 5, 2013, 4:49 pm

≫ Next: حوليات7: الدنيا زى المرجيحة

≪ Previous: حوليات5:رايحين شهداء بالملايين

$

0

0

و بتضربوا الناس فى التحرير يا ولاد الم... مرشد

و حياة امى هتلبسوا روحكم قضيه "موقعة الجمل" بجد حتى لو كنتم براءة بالعبط ده , و ساعتها مش هنلاقى حد يقف معانا نساعدك ...و بالصدفة البحتة بعد خطاب مرسى الاخير تندلع اشتباكات بين السرايات..و بعد خطاب بديع يحترق التحرير و ماسبيرو ؟!!! سلمية قوى الصراحة

انا من 3 ساعات كنت بتخانق مع الناس اللى عايزة تقصى الاخوان...و كنت بطالب بالافراج عن المعتقلين اللى من غير تهمه..كنت خايفه يا يلبسوا تهم

انا سحبت التعاطف ده بقى...بتضربوا الناس فى التحرير يا ولاد الكلب؟؟ بتعملوا موقعه جمل جديده عينى عينك كده؟؟...معندكوش اى مشكلة فى قتل الناس عشان الاهبل ابن الاهبل ..ده انتوا بتتكلموا فى السى ان ان اكتر ما كنتوا بتتكلموا مع قناه الاخوان

تقدر تقولى اقول ايه لماما لما تقول لى الاخوان هما اللى عملوا موقعه الجمل فى الثورة؟؟لما تقول لى "انزل يا بلتاجى و زل العيال بتوعك"

ارد اقول ايه؟؟ و الاخوان بيضربوا معتصمين عالهوا؟؟ ارد اقول لها ايه؟؟

بقى كنت اتخيل انى افرح لما اشوف مدرعات الجيش؟؟ انا دينا اللى نزلت مظاهرات يسقط حكم العسكر اكتر ما سمعت فيروز

لكن لما تلاقى الاخوان بيضربوا معتصمين على اطراف ميدان التحرير و الجيش داخل يحجز عايزنى اعمل ايه؟
******************************
-و ردا على كلام الاخوان بشرطة: أهو الجيش اللي كان حامي الميدان و الشرطة اللي بتوزع ماية خلعوا

-ما هو يا اما ميدخلش فتبقى حرب اهليه...يا يدخل و يعمل شو...يا يقتل حد و تبقى مصيبة..دى الاختيارات المتاحه لما تنزل مظاهرات مؤيده فى نفس مكان المعارضه...و الله العظيم تلاتة لو الجيش و الشرطة وقفوا يصدوا انت اول واحد هتطلع تكتبلنا ستاسيهات عن مذابح الاخوان
*****************************
عزيزى المعارض الرشيد ...يلعن ابو اليوم اللى شوفناكو فيه

خليك قاعد مستنى عالفيس الخناقة تخلص مبستما بان لو الجيش كسب يبقى خلصنا من الاخوان و لو الاخوان كسبوا يبقى خلصنا من العسكر...و يا سلام لو تكملها بدعاء اضرب الظالمين بالظالمين ...خليك مبسوط قوى و شيّر بقوه لاخبار انشقاقات الجيش و اخبار شبكة رصد...بس اوعى تنزل رابعة العدوية لاحسن الناس تحسبك عليهم ولا حاجه...خليك قاعد عالفيس فى كنبتك الحلوة كده الدافئة

خليك عايز مرسى يمشى بس من غير عسكر...و عايز الشرعية من غير مرسى

حوليات7: الدنيا زى المرجيحة

July 6, 2013, 4:20 pm

≫ Next: حوليات8: حزب الضلمة

≪ Previous: حوليات6: انا سحبت التعاطف ده بقى

$

0

0

الدنيا زى المرجيحه يوم تحت وفوق
فى خلق عايشه ومرتاحه وفيها ناس مش فوق
وانا ماشى بتمرجح فيها من تحت لفوق لفوق لفوق لفوووووووق


مصائب قوم عند قوم فؤائد: جاء اصطدام طائرة بوينج 777 فى امريكا مصلحة ليا و لمصر لان السى ان ان طلعتنا من دماغها...فانتقل الاخوان الى "الحرة" القناة الامريكانى اللى بالعربى

شفت على قناة "الحرة" -العربى بتاعه امريكا- الاخ عمرو عبدالهادي بتاع جبهه الضمير و الايميلات لو تفتكر ...يزبد و يرغى و يتوعد بشل البلد و ان الاخوان هيقضوا رمضان فى الشارع


يااااااااااااه فى نفس المكان ده كنت بخطط انى اقضى رمضان فى الشارع صياما و فطورا و دعاء على مرسى و الاخوان...فتلف الايام فى خلال اسبوع لا اكثر فتنقلب الادوار و يدعوا علينا احنا...الدنيا زى المرجيحة يوم تحت و فوق

لعل اجمل ما فى الموضوع ان الكابتشن عمرو عبد الهادى ده كان يقسم حتى من اسبوع انه مش اخوان بس بيحترمهم :D ....و جبهه الضمير بتاعتهم دى اللى هى الماركة المضروبة من جبهة الانقاذ و هو مثال حى زى حملة "تجرد" و هى تلاعب لفظى ليس اكثر من "تمرد" 

و يحضرنى هنا ذكرى اخرى هى سمنه "روبى" ايوه ده مش غلطة مطبعية دى كانت علبه مضروبة عن السمنة الاكثر نجاحا وقتها "روابى"...و علبه سمنه "النخلة" و هى تحريف للسمنه الانجح ايضا "النخلتين"...و نكتشف ان تجرد و جبهه الضمير هم تلاعب لفظى ليس اكثر و مؤسسات كارتونية ورقية لتشتيت الاعلام ليس اكثر و كلهم اخوان بس بيحترموهم

سيبك انت كنا فين و بقينا فين من اسبوع؟ : سبحان المعز المذل...ضاقت فلما استحكمت حلقاتها فرجت وكنت أظنها لا تفرج 

الان قواعد اللعبة مختلفة تماما عن ما قبل 30 يونيو ولاول مره الثورة هى الكفة الاعلى..شدوا الناس لقدام...اتحركوا فى الفترة الانتقاليه...اتكلموا فى تشكيل الوزارة , فى لجنة تعديل الدستور , فى الجدول الزمنى...اتحركوا فى خط مستقيم يجبر الناس انها تتقبل الوضع الحالى فيقل العنف و الاكتئاب

و للناس اللى عايزة مرسى ترجع...دعونى استعين بكلمات الزعيم الراحل نفسه: عقارب الساعة لن تعود الى الخلف
******************************
لا بجد هو انت متخيل ان مرسى ممكن يرجع؟؟ حتى لو حصل تنازلات ممكن تتخيل انه يرجع؟؟

يرجع يحكم شعب مش طايقه...و جيش رماه فى السجن...و قضاء ما صدق و جاب ريس مؤقت من عنده...و شرطة وزعت عالناس عصير ابتهاجا انه مشى...و فوق ده كله اعلام يقيم الافراح من يومها؟؟

 ده الراجل لو حس ان مراته مش بتحبه بيطلقها...و بعدين مش احنا شعب قذر و ما نستهلش؟؟ سيب اهالينا فى حالنا بقى
*******************************
-اعتذر عن الكتابة عن صورة حملة حوليات...فلن استطيع الكتابة الادبية الان باى شكل وسط حرب بلدى مع اعدائها...يمكن فى المستقبل لما نروق شوية

حوليات8: حزب الضلمة

July 7, 2013, 4:43 pm

≫ Next: حوليات9: كانوا بيبرروا ازاى؟

≪ Previous: حوليات7: الدنيا زى المرجيحة

$

0

0

بصوا بقى انا خلقى ضيق و مش بطيق الغلاسة على رأى عبد الناصر "فى خطبة شهيرة عن رفض المعونه"...و حزب النور ابتدى يرخم و انا بزهق من التأمير بصراحة 


"اصل انا بقرف قووووى قوووى قووى مره فتحت بطيخة لقيت كلها بذر رميتها....فتحت مانجايه لقيت فيها بذره كبيره اغمى عليا...اغمن عليا اغمن عليا اااى اااى اااى" حزب النور معلقا على ترشيحات الوزارة

مش فى ناس بتبيع تين شوكى على الكورنيش اهو حزب النور بيشتغل صفيحة ميه هناك...حزب لا له هيكل ولا نيله و الحقيقة مش عارفه هما بيتفردوا و يتنوا علينا ليه؟ 
انا بقول نفقع مرارة الاخوان بجد و نمسكها لثروت الخرباوى

و على رأى المدونة الرائعة نوران سراج الدين : سيادتك عارف الشعب اللى ف الميادين ده ؟؟؟ - أيوه .. - وحش ..ماتبقاش تشكل حكومة منه ! ‏#حزب_النور

لا استبعد ان يوم فعلا شباب حزب النور فى رابعه و قادة الحزب بيدمروا التوافق السياسى على جانب الثورة...هو عموما حزب مهلل و كارتونى من زمان



و لعل اشهر مثال هو لما اتفق قاده نفس الحزب مع ابو الفتوح ايام الجوله الاولى من الانتخابات و ده اللى خسروا اصوات بعض الليبرالين -و انا منهم- و بعد كده شباب حزبه صوّت لمرسىو غرقوا الراجل

بقى بعد ما فرحت امبارح ان البرادعى مسك لسه هاقول هيييييه و قلت مصر عادت شمسك الذهب بقى ...يعنى هنرجع نشرب خمرة و نشم هيروين و نضرب مكس و نقلع الحجاب زى زماااان بقى و كوليدات البيرة الساقعه هتنشر فى الشوارع , و نقلع الحجاب بقى على غرار ليبرالية يعنى ايه يا برادعى و يكون اول رئيس وزراء ميعرفش حزمه الجرجير فيها كام عود...و يمكن يستخدم علاقاته و يجيب انجلينا جولى وزيرة ثقافة

لا بجد انا كان عندى امل ان تعيين البوب اللى اتأخر 3 سنين يكون الحل بقى بعد مرحلة طويلة من التخبط من عصام شرف لقنديل و من سئ لاسوء...و حد يقنع العالم بلغته و فصاحته اننا ماشيين فى الطريق الصح

مش هاقول الكلام المعتاد بان حزب النور معملش حاجة فى 30 يونيو عشان يتشرط علينا..بس اظن كفاية بقى عك...فضايحكوا كتير و اظن كفاية بقى
*********************
اعتذر مره اخرى عدم استطاعتى التدوين بوحى صور "حوليات" فالوضع ببساطة لا يسمح

حوليات9: كانوا بيبرروا ازاى؟

July 8, 2013, 11:47 am

≫ Next: حوليات10: عالجمهورية هلوا

≪ Previous: حوليات8: حزب الضلمة

$

0

0

يحوى هذا البوست على بعض الافكار التى قد تراها متطرفه او حتى جبانه ..و تحوى بعض الالفاظ التى قد تراها غير لائقة -من الصعب جدا ان تحفظ لسان عفيف بعد كل ما مررنا به- لكنى ارجو ان تكون اكثر عفه فى اللسان و اكثر ادبا منى حتى و لو اختلفنا فى الرأى....مقدمة طويلة كما ترى لكنها ضروريه
******************************
هذا هو ببساطة تعليقى على موقعه الحرس الجمهورى:

اللى حصل بيفكرنى بيوم بورسعيد -بعد الحكم- 40 واحد اتقتلوا فى ساعتين من الداخلية "فى ظل محمد مرسى اللى حيا الشرطة بالمناسبة- ...نفس الاستهتار بحياة ناس , نفس الطبع و الوساخة المعروفين عن العسكر و الداخلية , هتقول لى الاخوان كانوا بيضربوا فى الجيش...هاقول لك الاهالى فى بورسعيد كانوا بيقتحموا السجن برضه..الاستهتار بحياة الناس قرف و مرفوض

 لكن بروح مامى مش هانزل ارجع مرسى برضه...نرفض الدم و العسكرة حاجه و نرجع الكائن المهلل ده حاجة تانية...مش باكدج هوه , الفرق بينا و بين الاخوان لما بيهتفوا "يسقط حكم العسكر" بسيط...احنا مكناش عايزين نرجع حسنى مبارك..

الجزيرة و صفوت حجازى قذارة للصبح انا معاك...بس الموضوع اكبر من كده المره دى...شبح احداث العباسية يطل من جديد..شامه ريحة غدر...و البيت عندى شبه يوم العباسية بالظبط

و ارجع و اقول العسكر اوساخ "و ده طبع فيهم" و الاخوان يجمعوا غباااء الدنيا و الاخره....يا ناس الاخوان بيجيبوا الغباء ده منين؟؟ استيراد؟...امبارح عمو صفوت حجازى يطلع يهدد و يتوعد و شباب الفيس من امبارح بيهلل بخطوات حاسمه و النصر القريب فى ال48 ساعه

و بعدين تتعمل مذبحة رسمى ليهم!! يعنى لا كسبتوا تعاطف ولا كسبتوا المعركة؟ يا شيخ يلعن ابو اللى بيفكر لكم...العسكر اوساخ و اذكياء : استنوا بعد ما صفوت حجازى و البلتاجى هلفطوا فى الكلام و عكوا و تهديد اجوف كالعادة...و ضربوا ضربتهم و الاسم الاخوان اللى ابتدوا و هددوا....الاخوان بقى اوساخ و اغبياء: رغى و تهديد و وعد "مسجل" بالتصعيد و النصر القريب و ورطتوا روحهم فى دم عيالهم

الاخوان هجموا و معاهم سلاح؟؟؟ اعتقد انه اه جداا....لكن 50 قتيل فى صفوف المهاجمين و قتيل واحد فى صف الجيش شئ مثير للريبة....و من خبرتى مع العسكر انه ما صدقوا شافوا شوية خرطوش و طوب و حتتين سلاح و اتلككوا و كان ممكن يتفض الهجوم بعدد اقل كثير من الدماء...فى استخدام مفرط للعنف واضح

بالمناسبة رسالتى للاخوان بقى: ابوس ايديكوا سيبونا نعرف نتعاطف معاكوا...و بلاش الشغل النص كم بتاع صور سوريا و قتلاها و تلبسها للجيش و كفايه متاجرة بدم عيالكوا

هو الاخوان كانوا بيبرروا ماسبيرو و بورسعيد ازاى؟؟ ده انا لما حاولت حسيت انى عايزه اتقيأ؟ كانوا مستحملين روحهم ازاى؟ 

و استرجع بعض من كلماتى القديمة "يوم حادثة ميدان النهضة" :

اللى بيموت بتحول لرقم...امبارح نمت مخضوضه و متنكده من اللى اقتلوا ...و صحيت ريقه متابعه المظاهرات و الاعداد و فجأة جه فى دماغى ان اللى ماتوا مكنوش حلم ولا اضغاث اخر الليل دول دم و لحم و اهل و سواد عزاء و لطم خدود و البقيه فى حياتك يا حاج و البقاء لله يا حاجه و شد حيلك يا دكتور

راجع بقى كل اللى اتقتلوا فى كل المواقع اللى من كترتها انتصرت على ذاكرتنا افه حارتنا و بقينا ننسى الاحداث نفسها مش حتى اسامى اللى ماتوا و صورهم

الخلاصه: اوعى تموت فى البلد دى...و انت فى اى مكان او تظاهر حافظ على نفسك جدااا و على اللى حواليك سيبك من حوار طنطك سلميه ماتت ولا عايشه المهم "انت" تكون سليم لا ناقص عين ولا ايد...لان اللى معاك هيتاجروا بدمك و اللى ضدك هينسوك و يناموا

الرساله للكل اخوان و اخوان بشرطة و للشعب...محدش يستاهل تموت علشانه بذات الكائن الهلامى المهلل اللى اسمه مرسى ده
**************************
كتكملة كده لحوار "الاتساق مع الذات" ....انا ارفض محاكمة اللى اتقبض عليهم عسكريا ...و على الرغم من ان الاخوان حاطوا المادة 198 فى الدستور المسلوق بتاعهم بجواز محاكمة المدنيين عسكريا فى الجرائم التى تخص القوات المسلحة بل و دافعوا عنها بقوه بانها جزء طبيعى فى البلاد...الا انى مش واطيه زيهم و مش هاعمل كده

لا لمحاكمة المدنيين امام المحاكم العسكريه...فى القضاء المدنى الكفايه ...اقطع رقبه المتهم لكن امام قاضيه الطبيعى ...ده رأيى ك دينا نبيل

حوليات10: عالجمهورية هلوا

July 10, 2013, 9:04 am

≫ Next: حوليات11:يوم رمضانى أول

≪ Previous: حوليات9: كانوا بيبرروا ازاى؟

$

0

0

و كانت صباح بتغنى فى ايام زى دى ابان وحده مصر و سوريا : 

لياليك الحلوة الزينة عالجمهورية هلو

احلو يا حلو رمضان كريم يا حلو

حل الكيس و ادينا بقشيش

يا نروح منجيش يا حلو

عادت و بلادي بتروي سعادة

وايات المجد شموع منئاده 

و الراية فوق قنالي منورة الليالي

و ارضنا الحبيبة مفيهاش ايد غريبة

و المجد للعروبة طول السنين يا حلو
*********************************
و بعيدا عن السياسة و عن صباح اللى ما قدرتش تكبت الكلام فى السياسة اللى مليانه نجاسه فى الشهر النضيف الوحيد اللى بيمر علينا فى السنه....رمضان و انا كبيرة مختلف خالص عن و انا اصغر...لسبب ما الاسئلة بتاعه كل سنه بتلح على دماغى:

-ليه الناس بتعمل لى تاج عالفيس فى صور فوانيس و عليها رمضان كريم؟؟

-ليه مارك ابن ام مارك مصمم الفيس على انه يدينى نويفكيشن مع كل رد على صورة الفانوس؟

-هو ينفع انى ما اردش على صور الفوانيس دى؟ و اعمل ان فولو على طول؟

-احنا عارفين ان "كل سنه و انتى طيبة" ردها "و انت طيب يا عمو/طنط"....و ان "رمضان كريم" ردها "الله اكرم"...لكن "اعاده الله عليكى بالخير يا دينا" دى ردها ايه؟

-ليه انا بقالى 10 سنين ما اشترتش فانوس؟

-ليه انا مش زعلانه انى ما اشترتش فانوس؟!

-ليه دايما عندى امتحان بعد العيد؟؟ اه و السنه دى عندى 4 امتحانات مش واحد بس الحمد لله

-ليه محمد هنيدى دمه بقى تقيل كده؟

-هو احمد مكى مش ربنا هيكرمه بقى ويعمل حاجة غير "الكبير قوى" ؟؟

-قبل ما يعملوا "رمضان جانا" بتاعه عبد المطلب الناس كانت بتعرف ان رمضان جه ازاى؟

-أحمد عبد القادر صاحب الاغنية الاشهر "وحوى يا وحوى" معملش حاجة ناجحه غيرها ليه؟

-ليه كل سنه بحكى قصه نشأة الفانوس و علاقتها بالدولة الفاطمية و ارجع اكررها السنه اللى بعدها من غير ما حد يقول لى ان ممله؟
****************************
سيبك انت من اسئلتى اللى ملهاش غالبا اجابة مقنعة...كل سنه و انت طيب

---

حوليات11:يوم رمضانى أول

July 10, 2013, 4:31 pm

≫ Next: حوليات12: الكلمة

≪ Previous: حوليات10: عالجمهورية هلوا

$

0

0

ايام الصيام صعبة عليا خلينى اعترف يمكن لانى -وا اسفاه- مش من اللى بيصوموا الاتنين و الخميس و الحاجات دى...

-من 5 سنين كان صيامى الحقيقى انى اصبر على الجوع لانى وقتها كنت باكل على فترات مليش فى الوجبات الكبيرة و كانت مأساة ...فى ال3 سنين اللى فاتوا كان صيامى الحقيقى انى اصبر على العطش لان رمضان كان مرابض فى الصيف و كانت ايام شديدة....الحقيقة اللى لازم اعترف بيها ان صيامى الحقيقى السنه دى انى اكتم لسانى عن الشتيمة فى ظل الظروف السياسيه العصيبة و مستوى الدراما المتدنى...ربنا يعديها على خير


و خفيت الحمد لله و لو مؤقتا من داء السياسة اللى مليانة نجاسة..و قضيتها مسلسلات بقى:


مسلسل "القاصرات" و "ذات" و "بدون ذكر اسماء" و "موجه حارة"  لفتوا انتباهى جدااا اخيرا مسلسلات بيناقش قضايا فعلا و كلهم مقتبس من اعمال ادبي , مسلسل "الداعية" عجبنى فيه اغنية المقدمة و النهاية بس فكره ان هانى سلامه و احمد فهمى متشددين دى بتضحكنى بصراحة , "الراجل العناب" مسخرة بس عسل زى ما تخيلت ,محمد هنيدى فعلا زى ما تخيلت تقيل و رزل و محروق معرفتش اضحك خالص و للاسف معاه احمد مكى اللى مش عايز يغير ولا يطور نفسه, مسلسل فرعون و الركين مشدنيش برضه

و خلينا نبقى واضحين: انا مش فاهمه اى حاجة من اعلان احمد عز...بس انا -لسبب ما- مبسوطة لما بشوفه ...سيبك انت القبول ده من عند ربنا احم بس هو من حيث قمووور فهو قمور قوى "بالقاااف"

و مازالت ابحث عن ذلك المسلسل اللى يدينى ايحاء و سمو "الخواجة عبد القادر" و مش لاقيه...المسلسل ده فتح لى باب استمتعت بيه سنه كامل سواء فى كتب او اغانى الصوفية


الاهم بقى : ذات مويمنت لما اكون قاعدة بتنطط من مسلسل لمسلسل و بتريق على الكل...و روح الناقد جوايا تطلع و تلعلع كده فى التفاصيل الدرامية و الراكور



و يجى بابا يغير و يجيب قناه جزيرة مباشر فى اعتصام رابعه و هما بيدعوا علينا



يو فيل لايك: انت بتكرهنى ليه يا حج؟؟

***************************

اهو يوم و عدى الحمد لله....مش ناقص غير ان ادق الناقوس  زى حسن الهلالى و اهتف: الاول

حوليات12: الكلمة

July 11, 2013, 6:09 pm

≫ Next: حوليات13: المثقف

≪ Previous: حوليات11:يوم رمضانى أول

$

0

0

و ليا مزاج اتكلم عن الكلمة...انهى كلمة؟ كل كلمة...كل ما اقرا عبد الرحمن الشرقاوى فى الحسين ثائرا و شهيدا و اوصل للمونولوج الشهير اللى بيطالب فيه الحسين بالبيعة فحين يرفض يٌضغط عليه بانها كلمة "مجرد كلمة" :
أتعرف ما معنى الكلمة؟
مفتاح الجنة في كلمة
دخول النار على كلمه
وقضاء الله هو كلمه
الكلمة لو تعرف حرمه زاد مزخور

الكلمة نور ..
وبعض الكلمات قبور
وبعض الكلمات قلاع شامخة يعتصم بها النبل البشري
الكلمة فرقان بين نبي وبغي
بالكلمة تنكشف الغمة
الكلمة نور
ودليل تتبعه الأمة .
عيسى ما كان سوى كلمة
أضاء الدنيا بالكلمات وعلمها للصيادين
فساروا يهدون العالم ..
الكلمة زلزلت الظالم
الكلمة حصن الحرية
إن الكلمة مسؤولية إن الرجل هو كلمة
شرف الله هو الكلمة”
******************************

و ارجع افكر تانى...هو لما محمد بديع يطلع يقول كلمتين فى رابعه ثم يصاب و يقتل العشرات بعدها....و لما صفوت حجازى يطلع يهرتل بكام كلمة ثم يقتل 52 شخص تفتكروا ان صفوت قرا "الحسين شهيدا" قبل كده؟؟ ولا ده فسق الاخر؟ طب بلاش دى مسمعش النبى فى : "وهل يكب الناس على وجوههم في النار الا حصائد السنتهم؟ "


و من غير ما امنع نفسى الاقى روحى بفكر فى كلماتى انا...و افتكر كل العك اللى بقوله انا عارفه نفسى بهرتل كتير و بغير رأيى 100 مره و لو امى طبخت القلقاس اللى مش بطيقه ده بيأثر فى نقدى و افكارى ...ياااه انا عارفه نفسى لسانى طويل و كلماتى دى مش "حصن الحرية" خالص...بس ادينى بحاول...لدرجة انى بفكر اخد الكلمتين بتوع عبد الرحمن الشرقاوى دول و اعملهم بوستر و الزقه قدامى يمكن حال لسانى يتحسن

حوليات13: المثقف

July 12, 2013, 6:24 pm

≫ Next: حوليات14:المضاد الحيوى ألذ ألذ ألذ

≪ Previous: حوليات12: الكلمة

$

0

0

لا أحد يشعر بمعنى التخلف ، قدر ذلك الكائن الذى يطلق عليه المثقف
المثقف ، تركيبة غريبة تطمح دائماً الى أن تعيش فى المعانى المطلقة و المجردة للأشياء. أقدامه مغروسة فى طين الواقع ، و عيونه الفاحصة المدربة ، قادرة على اكتشاف أصغر ما فى واقعه من متناقضات مزعجة

احساسه المركب المعقد قادر على تكبير الأخطاء ، و روؤية ما خلفها من معان و دلالات ، الأدهى و الأمر .. أن أغلب أحلام المثقف مرتبطة بفهم الواقع و القدرة على تغييره وضعه المعلق دائماً بين الحلم و الواقع ، يجعل منه وتراً مشدوداً . وضعه هذا يجعله يعيش اللحظة مرتين .. يذوق المر .. مرتين . و يندر أن يبقى فى فمه طعم لحلاوة


بقلم /استاذ علاء الديب من كتاب وقفة قبل المنحدر: من أوراق مثقف مصري

حوليات14:المضاد الحيوى ألذ ألذ ألذ

July 13, 2013, 3:09 pm

≫ Next: حوليات15:الصوفية و أنا

≪ Previous: حوليات13: المثقف

$

0

0

النهاردة النور قطع النهاردة 3 مرات "و كل مره بكون بكتب فى نفس المقال" و بما انه مقال نحس قررت انى أأجله و اكتب اى حاجة تانيه تفاديا لسوء الحظ


الصورة اللى فوق دى: ببساطة كده علبه دوا مضاد حيوى اتسليت عليها و النور قاطع بقلمى الجاف ...متعة خاصة علمتنا اياها مصر فى عصورها المظلمة و الكهربا مش موجودة...بس لسبب ما مكنتش متضايقة النهاردة مع اننا فى رمضان و الدنيا صيام صباحا و حر و ضلمة بالليل


هتقول لى هو انتى جبتى المضاد الحيوى منين؟ هاقولك لك بقى ملتهب و الله بس اطمن ده نفس الالتهاب بتاع كل 5 شهور فانا اتعودت عليه...جربت كل المضادات و الانواع الارخص بس مفيش فايدة مش بينفع معاه غير المضاد اللى الشريط 7 حبات ب30 جنيه...يعنى القرص قريب من 5 جنية !!! رايحة بينا على فين يا مصر

من ساعه ما مرسى مشى "تسجد شكرا لله..الله اكبر كبيرا, و الحمد لله كثيرا, و سبحان الله بكرة و اصيلا" هو انا كنت بقول ايه قبل نيه الاحرام دى كلها؟؟ اممممم اه افتكرت , من ساعة من مرسى مشى و قطع النور بقى خفيف على قلبى اه و الله...سيبك انت فى فرق شاسع ان النور يقطع و الوزير يطلع لك لسانه متغيظا اياك و بين ان ميكونش فى حكومه من اصله :D ههههه و النبى كده الذ واضح ان وجود الحكومه دى رفاهيه فعلا و زوائد جلديه محتاجة جلسات ليزرعند دكتور شاطر


بس الصراحة ان طريقة قطع النور فى حقبه ما بعد مرسى "هييييييه مكنتش اتخيل ان هيكون فى حقبه ما بعد ابن العياط" يوووه هو انا كنت برغى فى ايه قبل ما اهيص فى الهيصه؟؟ امممم اه افتكرت, طريقة قطع النور الذ و افضل على مرات متعدده قصيره كل مره تلت ساعه مثلا فمنكرهش حياتنا فى قطع ساعه متواصل فى الحر و الصيام...عارفه انها حجه البليد و البلاد المحترمة مش بتعمل كده بس اهو ادينا دولة تالته و لازم نعترف بكده


سيبك انت اللعب فى المضاد الحيوى متعه...و من هذا المنبر اناشد شركات الادوية باتاحة مكان ابيض اوسع فى العلبة عشان نفرح كده و نفرفش عقبال ما النور يجى

حوليات15:الصوفية و أنا

July 14, 2013, 7:23 pm

≫ Next: حوليات16:مسرح العبث و أنا

≪ Previous: حوليات14:المضاد الحيوى ألذ ألذ ألذ

$

0

0

مش بس لانه اسبوع الروحانيات على حوليات لكن لان التصوف بقى جزء من روحى مؤخرا من غير ما احس..يمكن اكون مش فاهمها بشكل تام و يقف اكتر من مصطلح عقبه فى طريقى..لكن بشكل ما صاروا جزء من وجدانى..

دايما بحس اننا محتاجين لمحات الصوفية فى الروح..و لمسات السلفيه فى العبادات..و روح مصر الاصيله فى التصرفات و مش محتاجين الاخوان فى اى حاجة خالص :)

لمحات الصوفية دى بتحمى العبادات من النمطية و التكرار اللى بينزع القدسيه..الصوفية هى حل لقتل "خطف صلاة العصر" ...لانها مش بتعمد على حاسبات الحسنات لا بتعمد على انك تندمج مع اللى خلقك ومع المخلوقات التانية
***********************
و على الرغم من فذلكته احيانا الا انى مستمتعه جدا ببرنامج يوسف زيدان فى رمضان على دريم و خاصه لما قال : "و يجى واحد يادوب بيفك الخط يقرا كلمتين فى كتاب صوفية مسمعش الكلام ده قبل كده ولا درسه فيقول ده كلام غريب و كفر" ايوه يا استاذ يوسف اهو انا عندى نفسى المشكلة دى برضه

لما بتكلم عن الصوفية بحب و اتصدم بالناس اللى بتكفرهم بتلخبط و مش بعرف ارد , عموما فى قاعدة عامه انك كل ما عرفت عن موضوع تفاصيل اكتر كل ما بقى صعب تلخيصه او زى ما قال "النفرى" احد الاباء الروحانين للصوفية: "كلما اتسعت الرؤية، ضاقت العبارة"

افهم الناس ازاى الحب؟ هو حب شمس التبريزى يتفهم؟ ولا كلام جلال الرومى يتشرح؟ولا شعر ابن عربى و نجم الدين الكبرى و الحلاج يتفصص و يتعمل فيه مذاكرات ليله امتحان؟ لا طبعا...اذا كان الحب ما يتحسش يبقى ايه اللى يتحس 
**********************
بحاول افتكر بدايات علاقتى بالصوفية فأفشل....امممم يمكن كانت البداية شعر الحلاج؟اظن ممكن ...و على ذاكرة السمكة التى امتلكها كانت البداية فى اغنية 

http://www.youtube.com/watch?v=VJFH-UidZUs&feature=player_embedded
الـــعَيْـنُ تُبـْـصِرُ مَن تَهْوَى وتَفقده
ونَاظِرُ القَلْبِ لا يَخْلُو مِـــن الـنَظَر
إن كَانَ لَيْسَ مَعْى فَالذِكرُ مِنهُ مَعْي
يَرَاهُ قَلْبِى وإنّ غَابَ عَنْ بَصَرِى
الوَجْدُ يُطربُ مَن فِي الوَجْدِ رَاحتٌ
والوَجْدُ عِنْدَ وُجُودِ الحَقِّ مَفَقُود
 قَدْ كَانَ يُوحِشُني وَجدْي ويُؤنِسُني
 لِرُؤيةِ وَجْدِ مَن فِي الوَجْدِ موجود

يومها اعجبت باللحن اولا...الحان و غناء عيسى بولص و باسل زايد كانت ببساطة عبقرية...ربما فقط فى المره التاسعه اللى ابتديت اسمع فيها الكلمات فعلا...و كعادتى -التى طورتها لاحقا- مع الحلاج اذهلنى فى سمو كلماته...تأخذك دون ان تدرى الى عالم خيالى تكاد تلمس فيه النجوم....و تتوالى الاغانى و يتوالى الشعر مع حلاجى انا...الى ان اصل الى مأساته
***********************
كانت قراءتى لمسرحية "مأساة الحلاج" للممتع صلاح عبد الصبور نقطة تحول سواء على صعيد السياسة او الصوفية:

اذا وليتم لا تنسوا ان تضعوا خمر السلطه فى اكواب العدل...قالها الحلاج فصلبوه ,لم يأخذوه بحديث الصوفيه و الحب الالهى كما ادعوا و انقدوا القطع الذهبيه فى ايدى الفقراء ليشيروا فاسق زنديق كافر بل اخدوه فى حديث القحط و الظلم و الملك و الفقر ..قتلوه بالكلمات و قتلوه من احبوه بان تركوه و قتله الظلم بدم بارد و سلطه دينيه ,قتله الحب بيد و قتلته الكراهيه بيد

ممتعه و قاسيه على قلبى و كأنى بصلاح عبد الصبور ينزف لا يكتب...خمسه نجوم و رب الكعبه ..استطاع صلاح عبد الصبور ان يجعل الحلاج مناره لكل ما يريد قوله فى السياسه فلا تشغل بالك بقصه الحلاج الحقيقيه بل استمتع بعذاب و نزيف صلاح عبد الصبور و فكر و كفى

و اتبعه بديوان الطواسين للحلاج ثم "تجليات الحلاج" ليوسف زيدان ايضا
***************************
و تستمر الرحلة الى ان نصل للعام السابق و مسلسل "الخواجة عبد القادر" ليأخدك عمر خيرت معه الى عالم السحرى ممزوجا بصديقى الوفى و اشعاره الحلاج لتصل -حرفيا- تلك المره الى النجوم ...لتجلس فى محيطها لساعه يوميا لمده شهر و هى تذكرنى بقوه برواية نقطة النور ل بهاء طاهر بالمناسبه

هل تعلم تلك الهمهمات التى تغنيها المجموعة بلفظ الجلالة (الله...الله...الله) قبل ان تنطلق فى الحان عمر خيرت بكلمات الحلاج؟

والله ما طلعت شمسٌ ولا غربت إلا و حبّـك مقـرون بأنفاسـي
ولا خلوتُ إلى قوم أحدّثهــم إلا و أنت حديثي بين جلاســي
************************
ثم أصل الى رحاب نجم الدين الكبرى على يد يوسف زيدان فى كتابه المتألق:
الكتاب مقسم بوضوح الى شقين منفصلين متصلين

الاول:مقدمه طويله اشبه بالدراسه بقلم الرائع يوسف زيدان شارحا عن تاريخ الشيخ نجم الدين و افضاله و اصحابه و معلميه و تلامذته و الجو التاريخى وصولا الى مشهد استشهاده...جاء هذا الجزء ممتع على الرغم من طوله و على الرغم من شعورك بانه موجهه للدراسين و المنشغلين بالبحث اكثر مما هو موجه الى القارئ العادى...ليوسف زيدان اليد العليا فى هذا الجزء حاضر الروح و كأنه يكلمك مباشره

الثانى: هو كتاب فوائح الجمال وفواتح الجلال بكامله بقلم نجم الدين كبرى نفسه....جاء الكتاب منساب الكلمات بسيط لطيف خفيف على الروح خاصه من حيث الالفاظ و التعبيرات على غير عاده كتب القدماء التى كثيرا ما تكون معقده و صعبه لغويا على القارئ المعاصر....شرح الكتاب ببساطه و بعمق عن الصوفيه بكثير من التفصيل لا ادعى انى فهمتها كلها لكنى احتفظ بها لقراءه ثانيه محتمله اكثر تدقيقا ...يتميز الكتاب بتقديمك لعالم الصوفيه المعقد بلطف و يجعلك مع مرور الصفحات تشعر بالصفاء الذهنى و المتعه الروحيه فكأنك تنظر للاسلام من زاويه ورديه حالمه رائعه حيث عشق العبوديه و الاستمتاع بالقرب من الله

فى هذا الجزء يتوارى صوت يوسف زيدان مكتفيا بالتعليق و الشرح فى اضيق الحدود تاركا للشيخ العلامه اليد العليا

اكرر لا ادعى فهم الكتاب بالكامل لكنه بالتاكيد كتاب ممتع و مفيد على اكثر من وجه
************************
و المرحلة التاليه كانت جلال الدين الرومى و شمس التبريزى...فى كتاب قواعد العشق الاربعون للكاتبة التركية اللى خطفنى لقونيا و رقصة المولوية ..ايد فوق و ايد تحت و تلف فى توب واسع ابيض ...ايد فوق و ايد تحت كأنك بتاخد من حب ربنا و توزع عالناس و انت بتلف فى مدارك الخاص زى باقى مخلوقات لله و كل فى فلك يسبحون

ثم دواوين جلال الدين الرومى نفسه: المنثوى و الرباعيات و شمس الدين التبريزى ..اللى قريتهم و طرت كعادتى معاهم فوق السحاب
**********************
هل ده مجال لذكر الحاجات اللى قريتها فى الصوفية؟ لا طبعا انا عموما بقرا كتير فى كل المجالات 

بس خلينى احاول تلخيص تأثير أهل الصوفة عليا فى كلمات الشيخ الاكبر ابن عربى:

لا لَكَ وأنت أنت.. لِأَنت.. ولَهُ ! فأنت مرتبطٌ به ما هو مرتبطٌ بك الدائرةُمطلقةً مرتبطةٌ بالنقطة النقطةُمطلقةً ليست مرتبطةٌ بالدائرة نقطةُ الدائرة مرتبطةٌ بالدائرة ”